ISANG magandang araw sa lahat ng ating mambabasa , lalo na diyan sa Japan na patuloy na dumarami ang ating mga suki.
Binabati natin sina: Teresa Yasuki, Mama Aki, Natsuki Yoda, Dina Suzuki, Glenn Raganas, , La Dy Pinky, Roana San Jose at Hiroshi Katsumata. Mabuhay kayong lahat!
***
Nasorpresa ang marami nang biglang dumating si Bise Presidente Sara Duterte noong Nobyembre 13 sa Quad-Committee hearing.
Umupo siya sa likod ng kanyang ama, dating pangulong Rodrigo Duterte, habang sinisiyasat ang mga extra-judicial killings (EJKs) na naganap sa panahon ng kanyang administrasyon.
Ang biglaang pagdating ni Sara ay tila hindi para sa pagkakaisa, kundi isang sampal sa mukha ng pananagutan—parang sinasabi nitong hindi kailangang sumagot ng pamilya Duterte sa kanilang mga pagkakamali.
Malinaw ang mensahe: kayang maglaan ni Sara ng oras para sa laban ng kanyang ama, pero pagdating sa mga isyu niya ng pananagutan, wala siya.
Ilang buwan nang sinisiyasat ng House Committee on Good Government and Public Accountability ang di-umanoy maling paggamit ng confidential funds sa halagang P612.5M ng Office of the Vice President (OVP) at Department of Education (DepEd).
Sa kabila nito, minsan lang siya dumalo sa hearing at agad na umalis bago pa man siya matanong ng seryoso.
Noong Setyembre, maging sa deliberasyon ng badyet ng kanyang tanggapan, wala siyang oras na magpakita, dahilan para magtanong ang publiko kung bakit tila mailap si Sara sa usaping paggamit ng pondo ng gobyerno.
Ang pagdalo niya sa hearing ng kanyang ama ay nag-iwan ng maraming katanungan: bakit may oras ang Bise Presidente na suportahan ang ama ngunit patuloy na iniiwasan ang pagtawag para sagutin ang kanyang sariling mga isyu sa pondo?
Madali para sa kanya ang tumabi sa ama kapag siya ang nasa ‘hot seat,’ pero kapag siya na ang kailangang sumagot, biglang nawawala.
Nang isalang ang dating Pangulong Duterte sa tanong ng mga mambabatas, tahimik na nakatingin si Sara.
Umupo siyang tila kasangga sa gitna ng mga pamilya ng mga biktima ng EJKs na naroon, isang malinaw na paalala ng mga pagdurusang dinanas sa ilalim ng “war on drugs” ng kanyang ama. Kahit nahirapan ang dating pangulo na pigilan ang kanyang pangkaraniwang brusko at bastos na pananalita, mas tumimo ang presensya ni Sara, na tila mas malakas pa ang pahayag kaysa sa anumang sagot ng kanyang ama.
Ipinapakita nito na mas pinipili niya ang pagiging kapamilya kaysa sa pagbibigay-linaw at pagharap sa katotohanan.
Para kay Sara, na may hawak ng ikalawang pinakamataas na posisyon sa bansa, ang pananagutan ay hindi dapat basta-basta na lamang nilalampasan.
Ang tanong ngayon: kailan siya magpapakita ng kahit kapirasong “suporta” na pinakita niya sa hearing ng kanyang ama pagdating sa sarili niyang mga eskandalo?
Patuloy na naghihintay ang mga mambabatas at publiko na ipakita ng Bise Presidente ang parehong dedikasyon at pagkakaisa sa pagharap sa mga alegasyon laban sa kanya.
(Para sa inyong komento at pagbati, mag-text sa +63 91786254484. Ilagay ang buong pangalan at tirahan).