Korapsyon sa DepEd

BAGO ang lahat, isang magandang araw sa lahat ng kababayan at kaibigan natin diyan sa Japan. Binabati ni Ate Theresa Yasuki si Charmaine Serna-Chua na kailan lang ay na-promote bilang Chief of Mission, Class 11. Ganun din kay Mama Melody Maeashiro na kamakailan ay nagdiwang ng kanyang kaarawan.

Binabati rin natin sina: Cherry Mayores. Christian Jimenez, Jessa Omigan, Reynante Abasula, Glenn Raganas at iba pa nating kabayan. Nawa’y patuloy kayong patnubayan ng Poong Maykapal.

***

Sa isang nakagugulat na pagsisiwalat na ipinahayag ni dating Department of Education (DepEd) Undersecretary Gloria Jumamil Mercado sa pagdinig ng House Committee on Good Government and Public Accountability noong Miyerkules, Setyembre 24, 2024, sinabi ni Mercado na “pinilit” siyang magbitiw sa tungkulin ni Undersecretary Zuleika Lopez, Chief of Staff ni Bise Presidente Sara Duterte, matapos niyang kwestyunin ang mga anomalya sa pagbili ng kagamitan para sa departamento noong 2023.

Si Mercado, na itinalaga ni Pangulong Marcos, ay namuno sa unit ng pagbili (procurement) ng DepEd habang siya ay nasa ahensya hanggang sa siya umano ay pinilit na magbitiw sa isang pulong kasama si Lopez sa tanggapan ng Office of the Vice President (OVP) sa Mandaluyong.

Ito ay matapos daw igiit ni Mercado na ang proseso ng bidding para sa programa ng computerization ng DepEd ay dapat umayon sa batas.

Ang pahiwatig naman ni dating DepEd Assistant Secretary Reynold Munsayac ay pag-usapan na lamang ang resulta ng bidding.

Ibinunyag din ni Mercado na hindi na siya nagtaka nang ipatawag siya sa OVP Mandaluyong matapos ang mga naunang insidente kung saan ang iba pa niyang mga kasamahan ay agad na nagbitiw matapos magkabanggaan sa kanilang mga nakatataas tungkol sa administratibong isyu.

Sa pagdinig noong Miyerkules, sinabi  ni Mercado na nakatanggap siya ng siyam na sobre na naglalaman ng P50,000 bawat isa, mula nang siya ay matalaga bilang pinuno ng unit. Ito aniya ay maaaring may layuning impluwensyahan ang kanyang mga desisyon na may kaugnayan sa kanyang posisyon.

Si Mercado ay may mahabang karera sa serbisyo publiko bilang isang edukador at tagapagsilbi ng pamahalaan.

Lalo pang umusbong ang mga iregularidad sa mga patakaran at gawain sa ilalim ng pamumuno ni Duterte sa DepEd nitong mga nakaraang linggo sa mga deliberasyon ng pondo para sa 2025 sa Kongreso, na pinalala ng tahasang pagtanggi ni Duterte na lumahok at tumugon sa mga tanong tungkol sa paggamit, o ayon sa nakararami ay maling paggamit, ng pondo ng publiko.

Humiling ang OVP ni Duterte ng P2 bilyon para sa badyet nito sa 2025, na dahil sa mga naunang pangyayari, itinuring ng mga mambabatas na labis, at kalaunan ay binawasan sa humigit-kumulang P700 milyon.

Naglabas ang Commission on Audit (COA) ng ilang ulat at memorandum, na nagbabawal sa ginawang paggamit ng mga pondo ng OVP at tinatanong ang kaduda-dudang implementasyon ng inaprubahang badyet ng DepEd noong 2022 at 2023.

Abangan!

(Para sa inyonh komento at suhestiyon, mag-text sa # +63 9178624484/email: philipreyes08@yahoo.com. Ilagay lang ang buong pangalan at tirahan)