“Natupad” na pangarap? Ano ang kasunod?

ANO mang araw, pormal nang uupo bilang bagong opisyal ng Bureau of Customs (BOC) si retired police general, Noel Estanislao.

Ito ay matapos siyang italagang ‘Collector VI’ ni Pang. Marcos Jr., noong Marso 11. Uupo siya bilang “hepe” ng ‘X-Ray Inspection Project’ (XIP), isa sa mga ‘juicy,’ err, sensitibong posisyon sa Aduana. Kailangan na lang niyang pormal na makapanumpa kay ES Lucas Bersamin at presto!

Papalitan niya ang ating kaibigan na si Coll. Ronie Principe na inilipat bilang bagong ‘Director III’ ng ahensiya.

Kung mayroong aktwal na dibisyon na hahawakan si kaibigang Ronie, hindi pa natin alam. “Pakunsuwelo” yata kasi ang tawag dito, kasamang Jomar C, hehehe!

‘Co-terminus’ ang posisyon ni Collector Estanislao. Ibig sabihin, aalis lang siya sa BOC sa pagbaba ni PBBM sa 2028—huwag lang siyempre siyang “sasabit” sa ano mang eskandalo o anomalya, hehehe!

Ayon sa ilang kaibigan sa PNP at militar, ‘direct commission’ si Estanislao sa Philippine Constabulary (PC), nagpunyagi bilang pulis at sundalo hanggang makuha ang “bilib” ni PBBM bilang ‘personal martial arts instructor.’

Oh yes, dear readers, “karatista” si General Estanislao! Gusto naman nating maniwala na bukod sa pagiging ‘Bruce Lee’ at pagiging “dikit” kay PBBM, may iba pa siyang kuwalipikasyon?

Pinamunuan din ni Estanislao ang ‘Task Force (TF) Jericho’ noon ng DILG sa termino ni Secretary Joey Lina. Pangunahing misyon ng TF Jericho ang paglaban sa ‘illegal gambling’ (jueteng).

Katulad naman ng alam nating lahat, patuloy pa rin ang “pamamayagpag” ng jueteng hanggang ngayon, hays!

Para naman sa mga miron, ‘dream come true’ (daw) ang pagpasok ni Estanislao sa BOC?

Hindi pa man kasi nakakaupo si PBBM noong 2022, aba’y “kalat” na ang “balita” sa pantalan na si Estanislao ang “susunod” na ‘customs commissioner,’ kapalit ni Comm. Jagger Guerrero, ang huling ‘BOC Chief’ sa administrasyon ni Pang. Duterte.

Sa kabila naman ng anunsiyo ng mga “Marites,” napunta ang puwesto kay dating Customs Police (ESS) director, Yogi Filemon Ruiz, bilang unang ‘Customs Chief’ ni PBBM.

Katulad din ng alam ng lahat, hindi kay Estanislao napunta ang “trono” nang palitan si Comm. Yogi noong Pebrero 2023 dajhil napunta ito kay Comm. Bienvenido Rubio, isang pangyayari na marami sa BOC ang natuwa dahil sadyang ‘insider’ at ‘rose from the ranks’ si Comm. Rubio.

Sa mga nagdaang ‘customs commissioner,’ mapapahanay si Comm. Rubio kay Comm. George Jereos na matagal din naging ESS director at, Comm. Titus Villanueva, na nagsimula bilang customs examiner sa Port of Manila.

Sa pag-upo ni Comm Rubio, hindi pa rin “natapos-tapos” ang “tsismis” sa pantalan na “uupo na” bilang ‘Commissioner of Customs’ si Estanislao.

At ngayong “nakapuwesto” na siya, ano kaya ang “susunod” na kabanata, sabik na tanong ng mga miron?

Kung pagbabatayan kasi ang “tono” ng mga pagbati kay Coll. Estanislao na naipasa sa atin ng ilan niyang mga kaibigan sa serbisyo, Asscomm. Jett Maronilla, puwedeng isipin na ang ‘appointment’ niya sa BOC ay “simula” pa lamang ng mas “magandang bukas” para sa kanya sa loob ng ahensiya! Oh yes, may ganern, hehehe!

Ayaw din nating paniwalaan, CIIS director, Verne Enciso, ang komento ng iba na “kung” hindi (daw) “makakaya” ni Estanislao na “masungkit” ang pagiging ‘commissioner,’ eh, ‘yung “bagay” na lang din sa kanyang pinagdaanan bilang pulis at sundalo.

‘Yun bang… may kinalaman sa “intelligence,” hehehe.

Kung totoo nga, ano kaya ang masasabi ni DCI General Juvymax Uy?

Abangan!