Walang ‘benchmarking’ kaya lang “sana all”

NATITIYAK natin na “natutuwa” ang ating mga ‘fiscal managers’ at kahit ang Palasyo ng Malakanyang sa magandang ‘collection performance’ ng Bureau of Customs sa ilalim ng liderato ni Commissioner Bienvenido Rubio.

Sa unang 3-buwan ng taon, nagrehistro ng ‘surplus collection’ na higit P16.6 bilyon ang Aduana habang higit P7.8 bilyon ang “pasobra” sa buwan ng Marso kung saan sa aktwal na koleksyon na P80.133 bilyon, pinakamataas ito sa nakaraang dalawang administrasyon sa loob ng isang buwan.

Sa impresibong koleksyon ng Aduana, dumarami naman ang “nagdarasal,” tama ba, ‘Boss’ Mary Zapata ng Aduana Business Club (ABC) na “sana all,” ganern?

Ang “panalangin” nila, Comm. Rubio ay tungkol sa ‘select few’ sa hanay ng mga importer na umano’y “nabasbasan” na tanggapin na lang sa Assessment Division ang kanilang mga idineklarang buwis na dapat bayaran.

Kung sa bagay nga, sa personal nating pakikipaghuntahan kay Comm. Rubio at Deputy Commissioner for Assessment, Atty. Vener Baquiran, “tiniyak” nila na “walang benchmark” sa deklarasyon ng mga dapat bayarang buwis sa BOC.

Tandaan dear readers na ang ‘benchmarking’ o ang pagtatakda ng dapat bayarang buwis sa ano mang importasyon ay mahigpit na ipinagbabawal at isang malaking paglabag sa batas o CMTA dahil wala naman itong ligal na batayan at paglabag din sa isinasaad ng GATT-WTO Rules on Valuation na siyang sinusunod ng ‘Pinas bilang ‘member state’ ng WTO sapul pa noong termino ni FVR.

Kung pakikinggan naman ang “himutok” ng mga importer na bumabagsak sa kategorya ng “gurami” sa pananaw ng ilang opisyales ng Aduana, maari nga (raw) na walang benchmarking, DOF Secretary Ben Diokno, pero… “mayroon” namang ‘favoritism,’ ganern?!

Oops! Sa pantalan, “gurami” ka kung ‘small time importer’ ka lang at walang “padrino,” hane?

Ilang kopya ng ‘SAD’ (single administrative document) o ‘customs entry’ ang ipinadala sa atin ng ilang miron para lang din patunayan sa atin na “totoo nga ang tsismis,” hehehe! ‘Yun bang, “iba ang tinitingnan sa tinitigan,” gets ninyo, dear readers, hehehe!

Translation? Mga “gurami” na importer ang “pumapasan” sa bulto ng mataas na koleksyon ng Aduana habang kuyakoy lang ang mga “pinagpala,” ganun ba ‘yun?

May ibinulong din sa atin na “wala namang “bago” sa listahan ng mga “nabasbasan,” katulad nitong ‘House of Thebes,’ si ‘JRT,’ ‘Dondon,’ Mike O’ at, ‘Sabater.’ Aber, kung may “bago” man sa kanila, walang iba kundi itong si ‘Grace V’ as in from ‘Visayas’ dahil ngayon ko lang narinig ang pangalan nito. Maliban kung “alias” lang din?

Hmm. Mayroon kayang malaking dahilan bakit “kakarampot” lang ang bilang ng mga ‘blessed persons’ ngayon sa pantalan?

Hindi kaya mababa ang ‘enrollment ‘rate’ o sobrang taas ng ‘enrollment fee,’ ano sa tingin mo, kasamang Wiliam Depasupil?

Abangan!